A conselleira de Política Social e Igualdade, Fabiola García, e o alcalde de Outes, Francisco Calo, mantiveron este mediodía unha reunión en San Caetano para analizar novas posibilidades de colaboración entre ambas administracións co fin de reforzar a atención ás persoas con discapacidade e dependentes do municipio e da comarca.
Durante o encontro, o rexedor outense expuxo as necesidades actuais do concello neste ámbito e salientou a importancia de dotar ao municipio dun centro residencial específico que dea resposta ás demandas das familias da contorna. Francisco Calo presentou á conselleira unha proposta de proxecto para a creación deste novo recurso e subliñou que, ademais de mellorar os servizos asistenciais, permitiría xerar novos postos de traballo na zona.
Pola súa parte, Fabiola García asegurou que o Goberno galego é consciente das necesidades do municipio e comprometeuse a avaliar o proxecto presentado polo Concello de Outes. A conselleira destacou a vontade da Xunta de estudar a súa viabilidade, coa finalidade de seguir mellorando a calidade de vida da veciñanza e ofrecer unha atención especializada e de calidade ás persoas con discapacidade da comarca.
