A Policía Nacional informa de que a investigación está aberta e que a detención do agresor está próxima
Os servizos sanitarios e a Policía Nacional auxiliarón en Santiago de Compostela un mozo adolescente que resultou ferido de dúas coiteladas nas inmediacións da igrexa de Santa Susana, no parque da Alameda, segundo informaron fontes da investigación.
O ataque produciuse tras unha discusión entre dous menores. Presuntamente, a vítima tería increpado ou molestado á moza do agresor, o que derivou nunha lea na que este sacou unha arma branca e asestoulle dúas coiteladas no abdome. Acto seguido, o autor dos feitos fuxiu do lugar.
Segundo as mesmas fontes, o ferido, axudado por varios amigos, desprazouse ata a contorna da estatua das Dúas Marías para pedir axuda. Alí acudiron de inmediato os equipos de emerxencias, que lle prestaron asistencia e o trasladaron ao hospital Clínico de Santiago, onde permanece fóra de perigo.
A Policía Nacional indicou que a investigación continúa aberta e ben encamiñada, e considera moi probable que o agresor, tamén adolescente, sexa detido nas próximas horas.
