UCIN Galicia compartiu un comunicado relativo á situación na que vive o Parque de Bombeiros de Santiago de Compostela, que, segundo lembra a agrupación, “volveu quedar inoperativo por terceira vez en menos dunha semana, con só catro profesionais cubrindo o servizo durante 24 horas para protexer a capital de Galicia”. Para UCIN, esta situación vulnera claramente o Plan de Emerxencia Municipal, aprobado polo propio Concello, que establece un mínimo de 12 bombeiros/as por quenda. “Porén”, engade a agrupación, “a realidade é que apenas un terzo desa cifra estivo operativo, e, de feito, os procedementos internos marcan un mínimo de 9 efectivos, número tamén incumprido”.
“Isto xa non é un problema local, é un problema rexional”, sinala José Luis Calo, coordinador de UCIN Galicia, engadindo que a situación de Santiago é “a punta do iceberg” dun colapso estrutural dos servizos de emerxencias en Galicia. “O que está a pasar en Santiago non é un caso illado, é o reflexo do abandono xeneralizado que sofren os parques de bombeiros en toda Galicia. Hai anos que advertimos desta situación, pero o presidente da Xunta, Alfonso Rueda, mira para outro lado mentres se xoga coa seguridade das persoas”, afirma Calo.
O responsábel de UCIN Galicia denuncia que “o sistema de emerxencias galego funciona baixo mínimos, con persoal esgotado, escaseza de medios e unha coordinación deficiente entre administracións”. E engade: “Non se pode garantir a seguridade cidadá cun servizo colapsado. O Goberno galego
leva anos permitindo que se recorten prazas, que non se cubran baixas e que os parques funcionen sen persoal suficiente. Iso é irresponsable e perigoso”, apunta.
Desde UCIN Galicia denuncian que “a inacción das administracións competentes, tanto o Concello de Santiago como a Xunta de Galicia, está poñendo en risco non só o patrimonio histórico da cidade, senón tamén a vida de miles de persoas. “Non estamos a falar dun problema puntual nin dunha cuestión sindical. Falamos dun fallo estrutural que require unha intervención inmediata da Xunta. O señor Rueda non pode seguir desentendéndose dun servizo esencial”, sinala Calo.
Por iso dende UCIN Galicia reclaman o seguinte:
-A cobertura inmediata de todas as prazas vacantes no Parque de Bombeiros de Santiago.
-A revisión do modelo de coordinación do 112 Galicia.
-Un plan autonómico de reforzo dos parques comarcais e municipais.
-Un compromiso real da Xunta para garantir a seguridade cidadá e laboral dos profesionais de emerxencias.
