O Auditorio de Rianxo vai acoller este sábado 8 de novembro a estrea no concello de Un deus salvaxe, de Talía Teatro. Será este sábado 8 de novembro ás 20.30 horas. Trátase dunha peza para público adulto de 70 minutos de duración. A entrada será de balde ata completar capacidade do espazo (con retirada de convites na billeteira do auditorio dende unha hora antes do comezo da función: máximo 2 por persoa).
Un deus salvaxe é un espectáculo abeirado ao Programa Rede Cultural da Deputación da Coruña.
Escrita por Yasmina Reza, a obra ponnos na pel de dous matrimonios, adultos e civilizados, que teñen un encontro para resolver un incidente protagonizado polos seus fillos pequenos: un deles partiulle dous dentes ao outro nunha pelexa no parque. Nada que uns pais civilizados non poidan resolver. Con este argumento, Yasmina Reza compón unha sátira da sociedade contemporánea e debulla con humor as relacións de parella, a educación, a competitividade,… pero, sobre todo, o exceso de corrección política.
