Recoñecer aos concellos que salientan pola súa contribución ao desenvolvemento rural, a conservación do patrimonio, a promoción da cultura local e a valorización dos seus recursos naturais é o obxectivo da distinción Pobo Máxico de España 2026, ao que Padrón aspira por primeira vez. Engadir que o municipio pertencente á comarca do Sar comparte candidatura con: A Pobra de Trives, Cambados, Combarro, Larouco, O Vicedo, Portomarín e Ribadavia.
Sinalar que o proceso de votación permanece aberto até o 10 de novembro ás 23:59 horas e permite emitir até tres votos diarios por persoa usuaria a través da aplicación móbil ou da web oficial de Pueblos Mágicos de España. O municipio máis votado en cada comunidade autónoma recibirá o trofeo que o acredita como Pobo Máxico 2026 durante a feira internacional FITUR.
Asemade, entre todas as persoas participantes sortearanse dez exemplares da guía de viaxes 18 Rutas Mágicas por España.
O Concello de Padrón agradece o apoio de entidades e persoas que xa se están implicando na difusión da candidatura. Entre elas destaca o Concello de Arjonilla, que anima a votar polo seu pobo irmán de Padrón. Desde o Concello animan a toda a veciñanza, asociacións e colectivos a amosar o seu apoio e contribuír a que Padrón obteña este recoñecemento, que serviría para seguir impulsando o turismo, o patrimonio e a cultura do municipio.
Por último, dicir que Padrón forma parte da rede de Pueblos Mágicos de España dende novembro de 2024, e é a primeira localidade da provincia da Coruña en acadar esta distinción. O recoñecemento, impulsado polo Instituto de Desenvolvemento Local e Estudos Sociais (IDL), pon en valor a singularidade das vilas con patrimonio cultural, natural e gastronómico de especial
interese.
