O alcalde de Padrón, Anxo Arca, e a concelleira de Turismo e Festexos, Chus Campos, recibiron este xoves na casa consistorial representantes das once empresas que este ano achegan máis de 21.000 euros para financiar o alumeado de Nadal. Grazas a esta colaboración público-privada, o Concello poderá incrementar os espazos iluminados tanto no casco urbano como na zona rural, incorporando novos conxuntos decorativos e mellorando a intensidade luminosa en todo o municipio.
As empresas participantes nesta iniciativa son Cortizo, Hotel Scala, Finsa, Grúas Estación, Elatisnor, Mármoles Orosa, Élite, Codega, Jardimaq, Tecven e Construcciones Sobrerrivas.
“Unha vez máis vemos como a colaboración público-privada beneficia a toda a cidadanía”, destacou o alcalde, quen agradeceu a disposición das firmas locais a “botar unha man” e contribuír a que “Padrón volva ser un punto de referencia do Nadal en Galicia”. Pola súa banda, a concelleira Chus Campos puxo en valor a implicación de empresas referentes no municipio para impulsar o comercio e a hostalaría local mediante unha iluminación máis ampla e atractiva.
Tras unha recepción institucional e a tradicional foto de familia no salón de Plenos, os representantes municipais e empresariais desprazáronse ata a rotonda da N-550, próxima ao Hotel Scala, onde se sitúa o cartel de benvida “Bo Nadal Padrón”.
Acendido das luces, o domingo ás 18.00 horas
O acendido do alumeado de Nadal terá lugar finalmente o domingo 30 de novembro a partir das 18.00 horas, logo de que o Concello decidise adiar o evento debido ás previsións de choiva para o sábado. A actuación da Mekanika Rolling Band, encargada de animar as rúas do casco histórico, tamén se celebrará o domingo.
