O xuíz do Tribunal de Instancia de Ribeira acordou a posta en liberdade do mozo detido este sábado por un suposto intento de parricidio no lugar de Vixán, na parroquia ribeirense de Carreira.
O xulgado tomou esta decisión á vista do estado médico do investigado, que se atopa ingresado na unidade de Psiquiatría do Hospital de Conxo, integrado no Complexo Hospitalario Universitario de Santiago (CHUS), e ante a previsión de que non poida prestar declaración dentro das 72 horas legais para manter a súa condición de detido.
O mozo fora arrestado á primeira hora da tarde deste sábado, despois de agredir supostamente ao seu pai cunha arma branca no marco dunha disputa familiar que comezou no interior da vivenda e continuou na rúa.
Os feitos ocorreron arredor das 14:00 horas, no núcleo de Vixán, e provocaron unha rápida intervención dos servizos de emerxencia. O pai resultou ferido e foi evacuado con vida ao Hospital do Barbanza, sendo posteriormente trasladado ao CHUS, onde permanece ingresado.
Segundo fontes xudiciais, o tribunal de instrución número 1 de Ribeira, que investiga o caso, aínda non recibira o atestado policial no momento da posta en liberdade, polo que o investigado non chegou a pasar a disposición xudicial.
