O Laboratorio Ecosocial do Barbanza organiza unha nova visita a iniciativas de referencia. Nesta ocasión visitarase a Comunidade de Montes de Zobra (Lalín) este sábado 29 de novembro, nunha actividade coordinada polo Concello de Rianxo.
A actividade forma parte do ciclo de visitas formativas a proxectos de referencia na xestión forestal en Galicia, desenvolvido no marco do Laboratorio Ecosocial do Barbanza. A iniciativa, dirixida a comunidades de montes, persoas emprendedoras e veciñanza interesada, busca achegar experiencias inspiradoras de aproveitamento multifuncional do monte galego e reforzar a transición cara a modelos forestais e agrogandeiros máis sostíbeis, xerando coñecemento práctico directamente aplicábel ao territorio.
Visita á Comunidade de Montes de Zobra (Lalín)
A CMVMC de Zobra, situada no concello de Lalín na Serra do Candán e integrada na Rede Natura 2000, é un exemplo destacado de activismo comunitario e preservación ambiental. O seu modelo multifuncional combina conservación do patrimonio natural e cultural co desenvolvemento
económico ligado ao territorio. A comunidade destaca pola súa aposta pola produción de mel e a recuperación das alvarizas tradicionais, pola gandería extensiva con razas autóctonas como a cachena e pola posta en valor do patrimonio e da paisaxe mediante rutas e recursos culturais.
A actividade é gratuita, con saída ás 09:00 h desde a Praza do Concello de Rianxo e ás 9:30h dende Santiago de Compostela con regreso previsto ás 15:00 h. As persoas interesadas deben inscribirse cubrindo o formulario.
Laboratorio Ecosocial do Barbanza
O Laboratorio Ecosocial do Barbanza conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. Coordinado pola Fundación RIA, o Laboratorio Ecosocial do Barbanza é un proxecto dedicado a promover a transición cara á sustentabilidade ambiental e a fortalecer a resiliencia na xestión territorial dos montes do Barbanza.
