O Concello de Rois conmemorará o 25N, Día Internacional para a Eliminación da Violencia contra as Mulleres, cunha serie de actos simbólicos, educativos e culturais que teñen como finalidade promover a sensibilización social e o compromiso colectivo fronte á violencia machista.
O propio 25 de novembro, o Concello impulsará a colocación dunha candea en cada negocio local e nas dependencias municipais, en memoria das vítimas da violencia de xénero. Xunto a estas candeas, deixará tamén folletos divulgativos para dar a coñecer o Centro de Información á Muller (CIM) Terras de Iria, que presta apoio e asesoramento ás mulleres vítimas da violencia nos concellos de Rois, Padrón e Dodro.
O venres 29 de novembro desenvolverase o acto institucional. A xornada incluirá a lectura do manifesto do Concello de Rois contra a violencia de xénero, reafirmando o compromiso municipal coa súa erradicación. Durante o acto, realizarase tamén unha mención expresa a cada vítima do último ano, no que será un momento de lembranza e respecto.
A continuación, o público poderá asistir á representación da obra Sen lingua, espectáculo da compañía Serea Teatro na que se aborda a violencia de xénero coa historia dunha parella na que o home eclipsa o espazo mentres a muller vai perdendo a súa voz.
Ademais destes actos principais, o Concello de Rois está a desenvolver outras accións complementarias arredor do 25N nos centros educativos do municipio:
-Colocación de sinais de STOP violencia de xénero no CEIP de Pumar-Urdilde, no CPPI dos Dices-Rois, na Escola de Educación Infantil e no Punto de Atención á Infancia.
-Obradoiro Hai saída grazas a ti, coa que o alumnado de 4º da ESO traballará a temática da violencia de xénero desde a reflexión e o papel activo da mocidade na súa prevención.
-Obradoiros impartidos pola dinamizadora do CIM para traballar a igualdade e o respecto co alumnado de infantil dos colexios de Rois e de Urdilde.
O Concello de Rois convida a familias, comunidade educativa e toda a veciñanza a participar nos actos e lembra que acabar coa violencia de xénero é labor de toda a sociedade.
