O Concello de Ribeira sacou a licitación a renovación do parque infantil da rúa Castelao, en Aguiño, co obxectivo de crear “unha área de lecer que dea resposta ás necesidades actuais da rapazada da parroquia”. Segundo informou o Concello, o parque precisaba dunha renovación urxente.
As obras consistirán na retirada dos actuais elementos de xogo para crear unha nova superficie lixeiramente máis ampla, na que se colocará un equipo combinado con capacidade para uns 36 nenos e nenas (dotado de tobogán, plataformas e zonas de rube), unha randeeira dobre, dous peiraos con figuras de animais e un balancín tipo carrusel. A maiores, dotarase de pavimento de caucho continuo e manterase o valado perimetral actual ao ser colocado recentemente.
Os traballos terán un prazo de execución de tres meses.
O orzamento de licitación é de 103.253,52 euros, IVE incluído, con cargo ao POS+2025. As ofertas presentaranse a través do Sistema de Licitación Electrónica da Xunta de Galicia (SILEX) antes das 23.59 horas do 9 de decembro.
