O Concello de Rianxo pon en marcha un programa de visitas formativas a proxectos de referencia en Galicia no ámbito da xestión forestal sostíbel, no marco do Laboratorio Ecosocial do Barbanza. A iniciativa, dirixida a comunidades de montes, persoas emprendedoras e veciñanza interesada, busca achegar experiencias inspiradoras sobre o aproveitamento multifuncional do monte galego.
A primeira saída será o sábado 8 de novembro, con visitas a dous espazos exemplares:
⎯ Monte Demostrativo do Pico Sacro (Boqueixón). Espazo formativo e demostrativo xestionado pola Asociación Forestal de Galicia, que integra silvicultura, silvopastoreo e restauración ambiental.
⎯ Comunidade de Montes de Carballo (Friol). Exemplo de xestión veciñal activa, que promove proxectos de micoloxía, apicultura e silvopastoreo, combinando produción, conservación e participación comunitaria.
A actividade é gratuíta, con saída ás 09:00 h desde a praza do Concello de Rianxo e regreso previsto ás 17:00 h. As persoas interesadas deben inscribirse cubrindo o formulario dispoñíbel en liña.
Estas accións forman parte do compromiso do Laboratorio Ecosocial do Barbanza por reforzar as capacidades locais e acompañar a transición cara a modelos forestais e agrogandeiros máis respectuosos co medio, xerando coñecemento práctico e aplicábel directamente ao territorio.
