O Concello de Noia vén de completar a obra de instalación dun sistema de enerxía fotovoltaica no Polideportivo Alonso Rodríguez, unha actuación que permitirá reducir de maneira notábel o consumo eléctrico da instalación e impulsar o uso de enerxía verde no municipio. O alcalde, Francisco Pérez, e o tenente de alcalde, Manolo Seijas, visitaron este venres 14 de novembro os traballos recentemente rematados.
Explicaron que a intervención, cun investimento total de 48.158 euros, permitirá un aforro estimado de arredor de 9.000 euros anuais na factura eléctrica, “favorecendo así unha xestión máis eficiente e sustentábel das infraestruturas deportivas municipais.
A obra foi licitada o 20 de agosto de 2025 e conta cunha subvención de 28.894,80 euros concedida polo INEGA (Instituto Enerxético de Galicia), dentro das liñas de apoio destinadas ao fomento das enerxías renovábeis. Durante a visita, Manolo Seijas destacou que “esta actuación forma parte da aposta do goberno local por avanzar na eficiencia enerxética e reducir custos a longo prazo, ao tempo que contribuímos a unha Noia máis respectuosa co coidado do medio”.
“Desde o Concello seguimos firmes no noso compromiso de modernizar as instalacións municipais,” afirmou o alcalde de Noia, Francisco Pérez. “Estamos incorporando solucións que non só reducen o impacto ambiental, senón que tamén melloran a calidade do servizo que ofrecemos á cidadanía. Esta é a liña na que queremos continuar avanzando”.
