O Concello de Boiro celebrou na mañá deste martes o acto institucional con motivo do 25N, Día Internacional da Eliminación da Violencia conta a Muller, e fíxoo coa lectura dun manifesto e a exhibición de pezas musicais creadas polo alumnado de 1º da ESO dos IES do municipio.
O concelleiro de Política Social, Raúl Treus, abriu o acto agradecendo a implicación do Centro de Información á Muller (CIM) e ao alumnado dos IES que participa neste acto xa que “non son so o futuro do noso concello ou da nosa sociedade, senón que deles vai depender que cheguemos á eliminación total da violencia de xénero ou vicaria”.
Pola súa parte o alcalde, José Ramón Romero, na lectura do manifesto, recoñeceu o compromiso total do Concello de Boiro na condena contra esta lacra: “Negar ou relativizar a violencia machista é contribuír á súa persistencia e, fronte a iso, esta institución e a sociedade deben manterse firmes, unidas e comprometidas”.
Logo dun minuto de silencio, o alumnado dos IES A Cachada, IES Espiñeira e IES Praia Barraña exhibiron as pezas musicais realizadas no obradoiro Creación musical pola igualdade que desenvolveron durante o último mes e que denuncian a problemática da violencia de xénero e axudan a dar visibilidade ás novas formas de violencia en contornas dixitais.
O Concello de Boiro inaugurou tamén unha exposición permanente que se pode ver na Casa Consistorial e será itinerante por centros sociais e de ensino na que se representan os fitos máis relevantes e datos en canto á loita contra a violencia de xénero.
Ademais, esta semana a Casa Consistorial iluminarase de cor violeta para reivindicar e dar visibilidade a esta lacra social.
