O salón de plenos do Concello de Dodro viviu unha xornada intensa este martes 11, coa aprobación da petición do BNG de acondicionamento da Eira da Malla de Bexo con cargo á deputación da Coruña e o expediente instruído polo voceiro nacionalista Xoán Bautista Mariño para nomear a Moncho Reboiras Fillo Predilecto de Dodro.
“Cando se cumpren 50 anos do asasinato do noso veciño de Imo máis coñecido dentro e fóra de Galiza como vítima do franquismo…” Así comezaba a xustificación resumida en pouco máis de catro folios do voceiro nacionalista Xoán Bautista Mariño que leu o pasado martes 11 no pleno ordinario de novembro nun salón cheo entre outras persoas con familiares, simpatizantes e o responsábel local do BNG.
Mariño explicou que “esta máxima distinción que concede o Concello de Dodro a título póstumo enmárcase dentro dunha serie de actos e actividades que desenvolve o Comité de Honra 50 aniversario do asasinato de Moncho Reboiras ao que pertencen a fundación homónima, a Fundación Terra e Tempo de Estudos Nacionalistas e a Fundación Galiza Sempre canda unhas vinte persoas camaradas de Reboiras ou que tiveron algunha relación co asasinado veciño de Dodro”.
Xoan Bautista Mariño agradeceu ao alcalde do PSOE e á UV “o apoio de recoñecemento a un dos veciños de Dodro máis sobranceiro glosando a súa formación intelectual, sindical e capacidade de liderado político que senta as bases da actual central sindical de clase maioritaria hoxe en Galiza con máis de cinco mil cen delegadas e oitenta e seis mil persoas afiliadas, a CIG que xunto con movementos culturais e desde a UPG, contribuíu a desenvolver o nacionalismo galego desde os tempos do franquismo chegando ata hoxe”.
Asegurou o voceiro que a rebelión é “a única vía que lle queda aos pobos oprimidos contra o fascismo citando varias declaracións da ONU” e engadiu que “o avogado Nemesio Barxa puido demostrar anos máis tarde a manipulación dos feitos e do atestado posterior onde se daba a entender que Moncho se suicidara; feitos que xa adiantara o historiador e sacerdote nacionalista Francisco Carballo asegurando que Moncho fora tiroteado polas costas con tres balazos”.
A familia canda o daquela deputado do BNG Paco Rodriguez conseguiu que o estado español o declare vítima do franquismo no ano 2009.
O voceiro do BNG engadiu que “a rúa Moncho Reboiras promovida desde o goberno polo BNG (2022) canda outras por toda Galiza con exposicións, publicacións ou documentais que se suceden súmase este agardado recoñecemento no seu concello natal ao que non se adheriu nin a dereita extrema nin a extrema dereita”. Mariño recriminou aos partidos da dereita “continuar ancorados nos recortes como os das infraestruturas galegas, os recortes en sanidade, os recortes en educación, amosándose no pleno tal e como son, agora co recorte democrático”.
Así continuou: “O de hoxe é outro acto necesario como recoñecemento pero para ensinar ás futuras xeracións no respecto como demostran no básico hoxe PSOE, UV e BNG. Para que nunca máis volvamos a sufrir o fascismo. As mulleres e homes de Galiza e as nacionalistas do BNG nunca saberemos ata canto lle debemos ás persoas que foron perseguidas polo fascismo no país e tamén ás de Dodro, nomeadamente a Xosé Ramón Reboiras Noia.”
