Finalmente e tal e como sinalamos este mércores 19 dende O Barbanza, o bono MercaNaVila da Deputación da Coruña foi ampliado ata o 03 de decembro. Esta prolongación das axudas ás compras locais nos concellos de menos de 20.000 habitantes terá ao concello de Noia como principal concello da campaña, segundo confirmou o Goberno local, engadindo que “Noia, xunto con Boiro, tramitaron recentemente unha solicitude formal para solicitar esta ampliación, co obxectivo de facilitar que a veciñanza puidese seguir aproveitando os bonos de desconto”.
Volvendo a Noia, trátase do principal concello beneficiario do programa, sendo o municipio que máis fondos captou a través do bono e superando o millón de euros en facturación, unha cifra que sitúa a Noia máis dun 25% por riba do segundo concello con maior volume no programa.
Grazas a esta ampliación levada a cabo pola Deputación da Coruña, os bonos poderán empregarse durante o Black Friday e noutras campañas de descontos, permitindo así un maior aforro e reforzando o impulso ao comercio local.
“Desde o Concello de Noia estamos moi orgullosos do traballo realizado e da confianza que a cidadanía deposita nos nosos establecementos, que continúan a ser un exemplo de dinamización económica e proximidade”, salientaron fontes do Goberno local.
