O Concello de Noia celebrou hoxe unha recepción oficial ao Club ITF Noia para recoñecer a súa brillante participación no Mundial Open ITFU Arxentina 2025, onde os seus deportistas competiron como membros da selección española. O acto reuniu representantes institucionais, directivos da Federación Internacional de Taekwondo España (FITE) e os protagonistas desta histórica actuación internacional.
Entre os asistentes estiveron o presidente da FITE, Carlos Enrique Martín Requejo, e a adestradora da selección nacional, Daniela Betiana Goitre. Pola parte do club participaron os competidores que viaxaron ao Mundial —Martín Iglesias Rial, Antón Neu Creo, Jacobo Vilas Martínez, Camilo Ardións Blanco, Leo López Collazo e Miguel Castiñeira Castro— xunto co seu adestrador, Antonio Blanco García “Dache”.
A representación municipal estivo encabezada pola concelleira de Deportes, Sandra González Castro, e o alcalde de Noia, Francisco Pérez.
Un resultado histórico para o taekwondo galego
A selección española da que formaron parte os deportistas noienses logrou un medalleiro extraordinario, con 4 ouros, 3 pratas e 4 bronces, ademais do trofeo ao mellor competidor masculino do campionato. Trátase dun resultado sen precedentes para o taekwondo galego nun evento internacional desta magnitude.
Recoñecementos e discursos
A concelleira de Deportes abriu o acto felicitando aos deportistas polo seu “traballo, entrega e dedicación” e cualificou de “orgullo para Noia” contar con atletas deste nivel. Tamén dedicou un emotivo recoñecemento ao adestrador Dache, polos seus 38 anos formando xeracións de mozos e mozas no taekwondo local.
O presidente da FITE salientou que os resultados de Arxentina representan “o mellor resultado da Federación nun evento internacional” e destacou a marcialidade e o exemplo mostrado polos competidores.
Pola súa banda, o alcalde de Noia expresou o agradecemento da vila ao equipo, lembrando que “un deporte tan duro non sempre ofrece as recompensas que merece”, e garantiu o apoio continuado da institución aos deportistas.
O adestrador Dache subliñou que é a primeira vez que un galego obtén o premio ao mellor competidor do torneo e pediu que o Concello siga apoiando os deportes de contacto, fundamentais na transmisión de valores e no desenvolvemento da mocidade.
Clausura do acto
A recepción concluíu coa entrega dun agasallo institucional aos deportistas e ao equipo técnico, como mostra de agradecemento polo seu esforzo, polos resultados acadados e pola excelente representación de Noia e de España no campionato mundial.
O Concello reiterou o seu compromiso co deporte de base e co impulso das disciplinas de contacto, celebrando o éxito dun club que continúa situando o nome de Noia no panorama deportivo internacional.
