A Xunta garante a atención pediátrica en Muros tras reunión entre Sanidade e a alcaldesa. Informa de que no centro de saúde son atendidos algo máis de 900 nenos e nenas, cumprindo as recomendacións das sociedades científicas en canto a número de pacientes por profesional.
O conselleiro de Sanidade, Antonio Gómez Caamaño, reuniuse esta tarde coa alcaldesa de Muros, María Lago, para abordar a situación da atención pediátrica no municipio. O responsable autonómico asegurou que o servizo está plenamente garantido polo Servizo Galego de Saúde (Sergas), seguindo as recomendacións das sociedades científicas sobre número de pacientes por profesional.
Acompañado polo xerente da área sanitaria de Santiago de Compostela e Barbanza, Ángel Facio, Gómez Caamaño explicou que a pediatra titular do centro de saúde de Muros, recentemente reincorporada tras unha ausencia xustificada, atende a algo máis de 900 nenas e nenos, cifra que se sitúa dentro da referencia de 1.000 pacientes por cupo fixada polas sociedades científicas.
No centro quedou vacante outra praza pola xubilación do seu titular. Para cubrir esta ausencia, a asistencia está a ser reforzada varios días á semana por outro profesional que, de maneira voluntaria, complementa a súa xornada ordinaria. O resto dos días, a pediatra actualmente en activo asume a atención dos pacientes adscritos a esa praza, garantindo a continuidad asistencial.
O conselleiro trasladou á alcaldesa as dificultades de cubrir as ausencias debido ao déficit de pediatras de atención primaria en toda España, e convidouna a sumarse á Xunta e ao Parlamento de Galicia para reclamar ante o Ministerio de Sanidade medidas eficaces que aumenten os recursos humanos nesta especialidade.
En caso de ausencia xustificada en Muros, os menores de 3 anos son atendidos en Noia por especialistas en pediatría, mentres que o resto da poboación pediátrica recibe atención dos profesionais de medicina familiar e comunitaria do seu centro de saúde, altamente cualificados para ofrecer asistencia ao longo de toda a vida.
Deste xeito, a xerencia da área sanitaria santiaguesa xestiona cada incidencia de cobertura de profesionais, malia as listas de contratación baleiras derivadas do déficit nacional de médicos.
