O Concello de Dodro leva todo o mes desenvolvendo diferentes iniciativas para conmemorar o 25N, Día Internacional da Eliminación da Violencia contra a Muller. Este sábado celebrouse unha andaina polo Xardín dos Valores, un percorrido circular na contorna municipal que simboliza, a través de pequenas placas, principios como prevención, equidade, liberdade, igualdade, empoderamento, xustiza, seguridade e fortaleza. Cada ano, neste espazo vanse plantando árbores como recordo de que a loita contra a violencia de xénero debe continuar.
Durante a actividade, os asistentes compartiron un tempo de reflexión sobre o significado desta data e sobre o papel que cada persoa pode desempeñar para contribuír á erradicación da violencia machista.
Ademais, o concello colocou cartelería nas portas dos centros educativos e nas estradas de acceso ao municipio, unha iniciativa impulsada polo CIM Terras de Iria, que busca visibilizar a mensaxe de igualdade e respecto en todos os ámbitos da vida comunitaria.
Como colofón, o vindeiro martes 25 de novembro terá lugar un acto institucional no concello ás 12.00 horas, no que se dará lectura ao comunicado emitido pola FEGAMP en conmemoración desta data. Con esta programación, Dodro reafirma o seu compromiso coa sensibilización social e coa defensa dos dereitos das mulleres.
