A banda De Ninghures, un dos grandes referentes da nova (e renovada) música de raizame galega estará esta fin de semana en Rianxo achegando un concerto, no mercado do programa Outono das Artes da Deputación da Coruña. Será o sábado 29 ás 20.30 horas na Sala Arcos Moldes do Auditorio. A entrada será de balde até completar o aforo (con retirada de convites na billeteira unha hora antes do comezo do concerto, máximo dous por persoa).
Segundo a presenta o Concello de Rianxo, De Ninghures é “unha das bandas referentes da potente e rica escena do folk galego actual”, un grupo que mestura mestría musical e actitude desenfadada, que sorprende en cada canción coas súas diferentes voces e a súa actualización das coplas e melodías populares, e que nos fai tanto bailar como emocionarnos coa súa particular fusión da música tradicional galega con ritmos e inspiracións doutras culturas como a latinoamericana ou a magrebí.
En 2022 publicaron Aquí, o seu primeiro álbum. Máis de medio cento de concertos e algúns sinxelos despois (coma o exitoso Morena) presentan traballo e espectáculo novo: Feira.
