Finalmente comezou este 19 de novembro o Plantatón, a campaña de plantación organizada por Fundación Montescola no marco do Laboratorio Ecosocial do Barbanza. A primeira xornada celebrouse este luns 17 de novembro co alumnado do CEIP Plurilingüe de Artes de Ribeira. Ao longo deste mes está previsto plantar 2.000 árbores autóctonas, entre elas castiñeiros, sobreiras, pradairos, bidueiros e cerdeiras, “especies frondosas fundamentais para a restauración ecolóxica, a prevención de lumes e a mellora da biodiversidade”, informaron dende Montescola, engadindo que o Plantatón combina educación ambiental, acción comunitaria e coidado do territorio, implicando centros escolares, asociacións e veciñanza comprometida cun modelo de monte máis diverso, resiliente e sostíbel.
Como dixemos, as actuacións están coordinadas pola Fundación Montescola, entidade con ampla traxectoria en sensibilización ambiental e educación para a sustentabilidade, que ten implicado a máis de 1.000 persoas voluntarias en proxectos de restauración e conservación do monte. A iniciativa mantén aberto o proceso de inscrición para todas as persoas e colectivos que queiran sumarse ás vindeiras xornadas. As persoas ou entidades interesadas en participar ou organizar unha plantación no seu monte poden escribir a: info@montescola.org.
Próximas xornadas programadas
18 de novembro: Colexio Jaime Balmes (Noia)
24 de novembro: CEIP Felipe de Castro (Noia)
1 de decembro: CEIP Felipe de Castro (Noia)
2 de decembro: CEIP Felipe de Castro (Noia)
Laboratorio Ecosocial do Barbanza
O Laboratorio Ecosocial do Barbanza conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. Coordinado pola Fundación RIA, o Laboratorio Ecosocial do Barbanza é un proxecto dedicado a promover a transición cara á sustentabilidade ambiental e a fortalecer a resiliencia na xestión territorial dos montes do Barbanza.
