O Ateneo Valle-Inclán de Ribeira (Café Bar Plaza) acolleu este xoves 27 de novembro a presentación do libro Brevísima historia do conflito entre Israel e Palestina, do escritor xudeu Ilan Pappé e editado en galego por Galaxia. Foi un acto ateigado de público procedente de Ribeira e do Barbanza e que contou coa presenza de Carlos Aymerich, autor da tradución, e do xornalista Domingos Sampedro.
Pappé expón en Brevísima historia do conflito entre Israel e Palestina as raíces coloniais do enfrontamento, desmontando mitos sobre a súa suposta complexidade. Explica como o sionismo, con apoio occidental, desprazou e oprimiu o pobo palestino, convertendo o conflito nunha loita desigual. Destaca a Nakba de 1948, a ocupación de 1967 e as circunstancias actuais en Gaza e Cisxordania como fitos dun proceso de limpeza étnica.
O seu relato desafía a narrativa oficial e esixe xustiza histórica.
Pappé, Ilan
(Haifa, 1954) é profesor de Historia na Universidade de Exeter, Reino Unido, codirector do Centro Exeter de Estudos Etno-Políticos. Foi profesor de Ciencias Políticas na Universidade de Haifa, onde tamén é director do Instituto Emile Touma de Estudos Palestinos.
