A Asociación Ambar das Persoas con Diversidade Funcional sumouse hoxe, 25 de novembro, Día Internacional para a Eliminación da Violencia contra as Mulleres, ás accións e campañas institucionais e propias para visibilizar e condenar toda forma de violencia machista. O compromiso da entidade estendeuse a diferentes actos comarcais, destacando a participación activa nos actos de conmemoración nos concellos de Ribeira e Boiro.
Voces con Diversidade na Praza Pública
Un dos momentos máis significativos foi en Ribeira, onde Noelia Argibay, integrante de Elas, grupo de artes escénicas de Ambar, tomou a palabra na praza do Concello para realizar a lectura do manifesto xunto con outras entidades colaboradoras como A Creba, AGADEA, A Cofradía da Dorna ou Cáritas.
Tamén colaboraron no acto varios colexios da zona, tanto na lectura como desenvolvendo dunha acción artística. Estes xestos, salientaron dende Ambar, “subliñan o compromiso ineludible tanto da nosa asociación e das demais entidades, na defensa dos dereitos de todas as mulleres, poñendo énfase nas mulleres con diversidade funcional”.
En Boiro, a Asociación Ambar tamén estivo presente no acto municipal, asistindo á actividade Micro Aberto que contou coa participación e pezas musicais do alumnado dos IES locais, reforzando a mensaxe de concienciación interxeracional.
Campaña contra a Violencia Dixital
Paralelamente, no Centro de Recursos de Ambar sumouse á campaña De Fronte, da Deputación da Coruña, baixo o lema Que o futuro non nos leve ó pasado. Esta iniciativa centrouse en visibilizar a violencia machista dixital, a miúdo sutil e normalizada.
Mediante un mural colectivo de compromiso, a campaña acadou un notábel éxito de participación. As persoas implicadas escribiron os seus pensamentos e compromisos persoais para colgalos nas súas tarxetas nun panel colaborativo, convertendo a acción nunha declaración conxunta contra a violencia de xénero.
A Asociación Ambar agradeceu a todas as persoas colaboradoras, participantes e entidades que demostraron estar unidas contra calquera forma de violencia.
