O Concello de Muros acolleu esta mañá o acto de entrega dos premios do concurso “Draw your map”, promovido pola Asociación Internacional Vía Querinissima, no que resultou gañador o alumnado de 5º de Primaria do CEIP Ramón de Artaza e Malvárez e de 1º da ESO do IES As Insuas.
O acto contou coa presenza do vicepresidente da Asociación Internacional Vía Querinissima, Arne Ivar Mikalsen; do secretario xeral do Consello Rexional do Veneto, Roberto Valente; do presidente da Asociación de Concellos do Camiño da Ría de Muros-Noia, Luis Oujo; e da alcaldesa de Muros, María Lago, nun evento de marcado carácter institucional e educativo.
Durante a cerimonia, Luís Oujo destacou “o bo facer do profesorado e do alumnado do CEIP Ramón de Artaza e Malvárez e do IES As Insuas”, lembrando que o xurado recoñeceu os seus traballos como “exemplos de intercambio, creatividade e interacción”, e que ambos proxectos foron seleccionados por unanimidade entre participantes de 10 países.
Pola súa banda, o noruegués Arne Ivar Mikalsen salientou a importancia de iniciativas coma esta “para darlle á xente nova un espazo no que expresar a súa creatividade, convidándoos a reinterpretar a viaxe de Pietro Querini con novos ollos, novas palabras e novos mapas. Un itinerario fresco e auténtico”.
Os premios, entregados por Luís Oujo e Erika Baldin, do comité executivo do Consello Rexional do Veneto, consistiron en diplomas acreditativos e unha achega de 500 euros en mobiliario escolar para cada centro educativo. Ademais, o alumnado premiado participará nunha viaxe sorpresa organizada pola Asociación de Concellos do Camiño da Ría de Muros-Noia.
Un proxecto piloto para fomentar a conciencia patrimonial europea
“Draw your map” é un proxecto piloto impulsado en 2024 pola Asociación Internacional Vía Querinissima co propósito de fomentar a conciencia patrimonial europea entre o alumnado de 7 a 14 anos e implicalos na divulgación da Vía Querinissima, ruta que recrea a viaxe do mariño e comerciante veneciano Pietro Querini, quen chegou a Muros o 26 de outubro de 1431 antes de continuar cara a Compostela, nunha das peregrinacións máis antigas documentadas do Camiño da Ría de Muros-Noia.
O traballo “Viaxa con Querini”, elaborado polo grupo de 5º de Primaria do CEIP Ramón de Artaza, foi recoñecido pola súa capacidade para promover a aprendizaxe e o entretemento a través dun proxecto visual e creativo de gran calidade, que convida a redescubrir a viaxe de Querini desde unha óptica educativa e cultural.
Pola súa parte, “Antes e agora”, presentado polo alumnado de 1º da ESO do IES As Insuas, destacou por comparar o pasado e o presente da zona, reflectindo a súa evolución histórica e a pegada deixada por Querini en Muros, nun enfoque que combina investigación, creatividade e difusión cultural.
