A Xunta de Galicia activou para mañá a alerta laranxa por temporal costeiro no litoral das provincias da Coruña e Pontevedra, segundo a información facilitada pola Axencia Estatal de Meteoroloxía (Aemet).
O episodio adverso afectará especialmente o noroeste, oeste e suroeste da costa coruñesa, así como as Rías Baixas e a zona do Miño no litoral pontevedrés. Prevese vento do sur e suroeste con forza 8 e mar combinada do oeste ou suroeste con ondas de ata seis metros.
Co obxectivo de garantir a seguridade das persoas e dos bens, a Dirección Xeral de Emerxencias e Interior da Consellería de Presidencia, Xustiza e Deportes informou da situación a través do Centro Integrado de Atención ás Emerxencias 112 Galicia aos concellos afectados, deputacións, servizos provinciais e agrupacións de Protección Civil, así como a clubs náuticos e entidades vinculadas ao mar.
Ademais, desde a Secretaría Xeral para o Deporte, a mesma consellería anunciou a suspensión da actividade deportiva federada e do programa Xogade no mar nos concellos afectados. A medida estará vixente desde as 09:00 horas deste martes ata as 09:00 horas do mércores, 12 de novembro.
A Xunta lembra á cidadanía a importancia de manterse afastada da liña de costa, evitando diques, rompentes e paseos marítimos, así como extremar as precaucións nas actividades marítimas e revisar os cabos e amarres das embarcacións ante o risco de forte ondada.
