A Xunta de Galicia anunciou a posta en marcha dunha campaña extraordinaria de vacinación fronte á gripe dirixida ás persoas de entre 60 e 69 anos que aínda non recibiron cita. A iniciativa desenvolverase a vindeira fin de semana, os días 29 e 30 de novembro, nos hospitais galegos.
Segundo informou a Consellería de Sanidade, a través da Dirección Xeral de Saúde Pública, estas persoas recibirán un SMS para acudir á vacinación, que se realizará nos sete hospitais de cabeceira do Servizo Galego de Saúde, en horario de 10:00 a 14:00 horas e de 16:00 a 20:00 horas. Pola súa banda, os hospitais comarcais reforzarán a campaña nos centros de atención primaria durante a xornada do sábado 29.
A medida responde ao adianto da vaga pandémica da gripe nesta campaña e busca incrementar a protección da poboación. Ata o de agora, Galicia conta cunha taxa de cobertura superior ao 75% entre maiores de 80 anos, mentres que no grupo de 70 a 79 anos sitúase arredor do 60%.
A Xunta anima á cidadanía a vacinarse tanto contra a gripe como contra a covid-19, co obxectivo de previr enfermidades e reducir a súa incidencia na poboación galega.
