A Secretaría Xeral da Lingua vai levar a Outes e Padrón o espectáculo Retrincos de Castelao, peza teatral sobre a vida do ilustre escritor, artista e político rianxeiro. Representarase na Casa da Cultura de Outes o día 22 de novembro ás 20.00 horas, e máis na sede da Fundación Camilo José Cela, en Padrón, o día 4 de decembro ás 20.30 horas.
Nesta proposta cultural, a través dun ollo de vidro que lle dá nova forma á realidade, os cómicos Isabel Risco e Fran Rei lévannos a presenciar a vida dos homes e mulleres que habitaron esta terra para que poidamos comprender, como comprendeu Castelao, quen fomos e quen somos. Con texto de Diego Rey, esta peza teatral supón un achegamento ao humor na obra do inmortal autor de Rianxo.
Retrincos de Castelao é unha das actividades con que a RDL súmase á celebración do Ano Castelao en 10 concellos da Rede de Dinamización Lingüística.
