A Asociación Francisco Lorenzo Mariño de Aguiño expresou a súa satisfacción pola entrega, na noite do sábado 29 de novembro, da doazón recadada a través dos aportes do público asistente ao Ciclo de Contadas de Humor FLM de Aguiño 2025, celebrado durante os sábados deste mes.
O ciclo estaba inicialmente composto por catro sesións, mais a prevista para o 15 de novembro, protagonizada por María da Pontragha, tivo que ser adiada debido á inundación do local. A actividade queda reprogramada para o sábado 17 de xaneiro, no mesmo lugar e á mesma hora.
Si se puideron celebrar, con grande acollida, as contadas do 8 de novembro con Celso Fernández Sanmartín, a do 22 con Vero Rilo e a deste sábado con Quico Cadaval.
Grazas á participación do público, acadouse unha recadación récord de 659,67 euros, que será transferida íntegramente á Asociación Galega de Nenos con Cancro (ASAN).
Dende a entidade organizadora destacaron a solidariedade da veciñanza e a importancia de manter vivo un ciclo cultural que, ano tras ano, combina humor, tradición oral e compromiso social.
