Con motivo deste 25 de novembro, Día Internacional para a Eliminación da Violencia contra as Mulleres, a Asociación Boirense de Empresas (ABE) volve sumarse á campaña De Fronte da Deputación da Coruña, reforzando a súa mensaxe de rexeitamento absoluto ante calquera forma de violencia machista.
A ABE quere lembrar que “hoxe e sempre abonda de violencia, de discriminación e de medo”. E engade a patronal boirense: “A violencia machista non é un feito illado nin un problema individual: é un problema estrutural e social que nos implica a todas e todos, e que require educación, sensibilización e compromiso colectivo para ser erradicado.
Este ano, a Asociación Boirense de Empresas incorpórase á rede de Puntos Violeta, unha iniciativa promovida polo Ministerio de Igualdade para implicar ao conxunto da sociedade na loita contra a violencia machista.
O Punto Violeta forma parte do Plan de Mellora e Modernización impulsado polo Goberno de España, nun contexto de alarma social ante o incremento de casos de violencia contra as mulleres, e supón un cambio de enfoque nas políticas públicas: a loita contra a violencia machista é responsabilidade de toda a sociedade.
Converterse en Punto Violeta significa que a ABE “se transforma nun espazo seguro, accesíbel e sensibilizado, capaz de ofrecer información e acompañamento ás mulleres que o poidan necesitar”, explicou a directiva da patronal, facendo un repaso polas súas principais ferramentas:
Guía Punto Violeta para actuar fronte á Violencia Machista
Recollerá información clara sobre como actuar ante un caso de violencia no noso entorno, recursos dispoñíbeis para vítimas, sinais de alerta e tipos de violencia.
Materiais para entidades e establecementos
A ABE disporá de carteis e adhesivos identificativos cun código QR ligado á guía oficial, indicando que a sede é un espazo seguro onde calquera muller pode recibir información e apoio.
Distintivos persoais
Persoas identificadas como Punto Violeta servirán de canle directa para facilitar o acceso das vítimas aos recursos que precisen.
Compromiso do tecido empresarial boirense
Como parte esencial da vida social e económica da vila, o tecido empresarial debe ser tamén motor de cambio. Por iso, sinala a ABE, “reafirmamos neste 25N o noso compromiso cunha sociedade máis segura, máis igualitaria e máis xusta”.
