O director xeral de Comercio e Consumo participou hoxe en Vilagarcía de Arousa na iniciativa Cociña de culler, organizada pola Federación de Prazas de Abastos de Galicia co apoio da Xunta. A actividade ten como obxectivo impulsar as compras de produtos de proximidade nos mercados tradicionais, ao tempo que pon en valor a gastronomía galega propia desta época do ano.
Durante a visita, o responsable autonómico percorreu os distintos postos do mercado arousán adheridos á campaña e destacou a importancia de apostar polos produtos locais como garantía de calidade e sustentabilidade.
Ademais, aproveitou a ocasión para anunciar que no marco do Plan estratéxico do comercio de Galicia 2025-2030 se reforzarán durante o vindeiro ano as iniciativas destinadas á modernización das prazas de abastos. Entre elas figuran as liñas de axuda dirixidas á súa certificación como Mercados Excelentes, á rehabilitación das instalacións e á dinamización comercial, cun investimento global próximo aos 4,5 millóns de euros.
