Este sábado 25 de outubro a asociación Vai de Roda vai celebrar o seu Serán de Rianxo no Campo de Arriba da vila rianxeira. Será a partir das 19.30 horas (primeiro o Seranciño e logo o Serán propiamente dito) e achegará a residentes e visitantes unha boa oportunidade para achegárense á música e ao baile tradicional e “para compartir e gozar en comunidade arredor da música e o baile”. Organiza Vai de Roda co apoio da Deputación e do Concello.
Vai de Roda é unha asociación xurdida hai case dúas décadas para “promover e divulgar a música e o baile tradicional galego, así como todas aquelas formas de expresión que estes leven asociados (tecidos, vestimentas, costumes…)”.
Ao seu abeiro impulsouse unha escola de música e baile tradicional que é xa un referente no Barbanza e Galicia no ámbito formativo e dinamizador. Este legado divulgador e dinamizador é unha das claves dos seus festivais, entre os que se atopa o de Nadal.
