UCIN Boiro emitiu un comunicado no que acusa ao Concello de “falta de transparencia” en materia de recadación cultural, concretamente no recadado a través entradas solidarias do Mes da Danza. “Aínda que se cobra unha entrada simbólica de 3 euros con fins sociais, ata o de agora, case terminando o mes e só quedando unha actuación que celebrar, aínda non se informou que entidades serán as beneficiarias nin baixo que criterios se seleccionaron”, sinala a agrupación.
No comunicado tamén se di que o Concello “non detalla onde mercar as entradas”.
A formación esixe a publicación inmediata da listaxe de entidades beneficiarias, os criterios de selección e as cantidades que recibirá cada unha. UCIN Boiro lembra que “aínda non se fixo pública a recadación do concerto Un piano & 100 velas”, celebrado o pasado 23 de agosto no Pazo de Goiáns, cuxos beneficios ían destinados a SOGAPS (Solidariedade Galega co Pobo Saharauí).
Ademais, critican que “para este último concerto nomeado, veciños denunciaron en redes sociais sociais que conseguir entradas converteuse nunha misión case imposíbel, máis complicada que facer a declaración da renda”.
UCIN Boiro considera que “a concelleira de Cultura debe dar explicacións urxentes para despexar calquera dúbida sobre posíbeis intereses pouco claros na xestión destas doazóns”.
