Persoas novas sobradamente fachas. Talvez consecuencia da inconsciencia. Quen sabe se por mor duns bisavós que levaban tal condición no seu ADN e o transmitiron aos seus descendentes cun salto xenético e xeracional polo medio. Franco, a aguia, a camisa azul e a boina colorada da “falange” resultan atractivos e rechamantes para os que simplemente herdaron o silencio do medo a un pasado escuro que non entenden, non. Son as novas camadas do que nen sequera estudaron nos institutos nen nas universidades que a moitas xeracións anteriores -con ou sen becas no seu currículo- se lles negaron nesta España de camisa branca de añil e xabrón Lagarto que destruía as unllas das mans nos lavadoiros dos ríos e con moito que andar por de diante para chegar á lavadora automática.
Saberán realmente que expresan nos seus cánticos, o significado da súa xestualidade, o valor de correr para queimar mobiliario urbano que pagaron co seu suor os avós ou os pais, ao pior seus bisavós coas respectivas vidas? Que xustifica esa agresividade que amosan na rúa, nos estadios e polideportivos cos que os do meu tempo soñabamos e nunca tivemos?
Deben saber, si. As redes sociais ensinan moito, máis ca unha charleta co profesor ou profesora de turno. Son, son, son persoas novas sobradamente fachas, posiblemente con escaseza de experiencia, aos que nen sequera preocupa o cualificativo que non gustaría (agás contadas excepcións) aos pais. Fachas sen causa, rebeldes porque o teñen todo… ou hai causas que se chaman traballo, salario digno, vjvenda, coa que xustifican ante eles mesmos -coma nun espello- o que dentro duns minutos poderán ver nas redes sociais e nas televisións?…
Vai 30 anos, pais destas novas xeracións tamén farían preguntas sobre por que Aznar apañou tanto voto xove nas eleccións de 1996. Ten unha explicación o voto ultra dos xoves de 2025?…
A violencia, a pobreza, a exclusión, a crise humanitaria, a estigmatización disque son as causas que xustifican este troco. Disque.
Tamén en Francia, Italia, Alemaña, Portugal, etc.?…
É hereditario ou non o progresismo?. Por que, logo, os denominados fachas xoves?…
