O PSOE de Rianxo emitiu un comunicado no que se mostra moi crítico co Goberno local xa que, indican, “por segundo ano consecutivo non presentou as contas do exercicio 2024, a pesar de que a lexislación establece que deben aprobarse antes do 31 de marzo do ano seguinte”. Para os socialistas, “este ano queda en evidencia que non se adoptou ningunha medida para solucionar a situación, deixando unha sensación de opacidade e falta de control interno real”. Din tamén que “durante todo 2025 non se levou a pleno ningunha proposta de recoñecemento extraxudicial de crédito”.
A isto, din, “súmase que o Goberno acumula atrasos de máis dun ano no pagamento a provedores, empresas e asociacións locais, mentres a débeda coa empresa concesionaria do servizo de auga supera xa os 300.000 €”, sosteñen, sinalando que “realizar só un recoñecemento extraxudicial ao ano implica unha clara falta de interese real polas empresas locais, saltándose procesos administrativos e, ao mesmo tempo, trasladándolles a elas a carga económica, incrementando a débeda do Concello”.
Os socialistas apuntan que “cando esta situación chegue ao pleno, é de prever que a compracencia do Partido Popular de Rianxo volva poñerse de manifesto, baixo o xa coñecido lema de polo ben de Rianxo, mentres as empresas seguen máis dun ano sen cobrar polos servizos prestados”.
Para o PSdG, “estas alturas xa deberiamos estar pendentes do peche da conta de 2025, e non só a falar do orzamento de 2026”. Desde o PSOE recalcan que “analizaremos con rigor as contas do próximo exercicio e traballaremos para que nelas se contabilice de forma real e transparente a débeda que este goberno está a xerar a través de facturas sen pagar e pagamentos suprimidos ou atrasados”. Engaden que “esta situación non só quebra os prazos legais —como o pago máximo de 30 días a provedores ou a aprobación das contas antes do 31 de marzo—, senón que deteriora a confianza na xestión municipal, debilita o control interno e pon en risco a sustentabilidade financeira de Rianxo a curto e medio prazo”.
