O Pleno do Senado aprobou, a proposta do senador Manuel Ruiz, voceiro do Grupo Popular na súa Comisión de Pesca, unha moción que insta ao Gobierno de España a “actuar con firmeza en Bruxelas para evitar a ampliación das zonas de veda no Atlántico nororiental, que actualmente ascenden a 87 e que a Comisión Europea pretende ampliar ata 104 —e mesmo 115 nalgúns escenarios”.
A iniciativa alerta de que “esta ampliación ameaza directamente a viabilidade de miles de empregos e o futuro de comunidades costeiras enteiras, xa que afecta de forma desproporcionada a artes sostíbeis e altamente selectivas, como o palangre de fondo tipo pedra-bóla”.
Neste sentido, a Comisión de Pesca do Senado insta ao Goberno a:
1. Reforzar as xestións diplomáticas e políticas no ámbito da Unión Europea para evitar a ampliación das zonas de veda no Atlántico nororiental, actualmente fixadas en 87 e que a Comisión Europea pretende ampliar ata 104.
2. Presentar ante a Comisión Europea informes científicos e socioeconómicos que xustifiquen a non necesidade da devandita ampliación, tendo en conta a escasa afección de artes selectivas como o palangre de fondo sobre os ecosistemas mariños vulnerábeis.
3. Impulsar unha estratexia común con outros estados membro afectados, que permita defender unha posición equilibrada no Consello de Ministros de Pesca da UE.
4. Asegurar a participación activa do sector pesqueiro e das comunidades autónomas no deseño da posición española ante a UE.
5. Defender a especificidade das artes de baixo impacto, como o palangre de fondo tipo pedra-bóla , promovendo o seu recoñecemento diferenciado fronte á artes móbiles e solicitando que ICES (International Council for the Explorationof the Sexa) realice unha avaliación técnica específica sobre a súa interacción cos ecosistemas vulnerábeis.
6. Continuar colaborando activamente cos organismos científicos internacionais, como ICES e STECF (Scientific Technical and Economic Committee for Fisheries) para achegar datos precisos sobre a distribución de hábitats sensible e o impacto real das distintas artes, contribuíndo así a unha xestión pesqueira baseada na evidencia.
Argumentos de fondo
Os populares lembran que en setembro de 2022, a Comisión Europea aprobou o Regulamento de Execución (UE) 2022/1614, que estableceu 87 zonas de veda no Atlántico nororiental para a pesca de fondo. “Esta decisión, adoptada sen informes científicos completos nin unha avaliación socioeconómica rigorosa, provocou un duro golpe á frota española, especialmente á de arrastre e ao palangre de fondo, que constitúe unha das artes máis selectivas e sostibles do continente”, sinalaron, engadindo que “a resposta do Executivo foi tardía, insuficiente e reactiva, xa que en lugar de anticiparse e defender con firmeza os intereses da frota no seo da Comisión e o Consello, o Goberno limitouse a recorrer a norma, e en xuño de 2025 o Tribunal Xeral da UE deu a razón á Comisión”. Agora, din, “mentres o Executivo central anuncia un recurso de casación, a realidade é que a Comisión Europea planea ampliar estas vedas de 87 a 104 zonas —e mesmo ata 115 segundo algúns escenarios—, ameazando directamente a viabilidade de miles de empregos e o futuro de comunidades costeiras enteiras”.
