O novo Goberno municipal de Ribeira está a traballar na axilización dos procesos para materializar o Centro de Deportes Náuticos, o cal estará emprazado en Aguiño. A alcaldesa, María Sampedro, dixo que “moitos proxectos municipais de importancia para a cidadanía estaban paralizados” e que un deles “afecta de cheo aos nosos deportistas como é o Centro de Deportes Náuticos”.
Co obxecto de darlle impulso, recentemente a rexedora, xunto coa concelleira de Economía e Facenda, Herminia Pouso, e persoal técnico municipal, mantiveron unha reunión de traballo coa empresa adxudicataria da obra UTE Xestión Ambiental de Contratas SL e Prace Servicios y Obras SA.
A partir da vindeira semana chegarán as estruturas prefabricadas de formigón para conformar o esqueleto da nave despois de que fose preciso modificar o proxecto por cuestións do terreo que afectaban á cimentación. Deste xeito, o Concello estima que no mes de novembro dispoña das paredes e, en decembro, conte con cuberta.
Tras esta fase que centrada no exterior do centro deportivo, comezarase a actuar no interior para finalizar a obra, previsiblemente, en marzo.
No que respecta ao equipamento, a mandataria local indica que “se contará coa colaboración do Club de Remo para asesorar no material deportivo necesario e idóneo para o correcto desenvolvemento da súa actividade”. A construción consta de 1156 metros cadrados divididos en dous andares. No andar baixo habilitarase a zona de almacenamento de embarcacións, o foxo de adestramento, a recepción, aseo adaptado e almacén. Doutra banda, na primeira planta situarase o salón multiusos con aula e cociña office, despacho, baño adaptado, vestiarios, ximnasio e almacén. O importe total da adxudicación do contrato é de 1.179.750 euros, IVE incluído.
