O Parlamento Europeo vén de aprobar unha nova normativa para reducir e eliminar a contaminación por microplásticos, un paso adiante fundamental para protexer o medio mariño e o futuro das nosas costas.
Desde o BNG de Muros celebraron este acordo, pois, segundo din, “será claramente beneficioso para as nosas costas e para o conxunto do país”.
A alcaldesa de Muros, María Lago, resumiuno así nas súas declaracións: “O vertido dos granulados plásticos deixou en evidencia as eivas dun sistema que prioriza os intereses económicos fronte á protección ambiental. Desde Muros demostramos que o municipalismo tamén pode marcar rumbo e facer política con maiúsculas, influíndo máis alá das fronteiras locais. E fixémolo nun contexto desfavorable, no que a propia Xunta de Galiza e o PP negaban a gravidade dos feitos, tildándonos de alarmistas e oportunistas. Este avance en Europa é unha boa noticia, pero tamén un recordatorio: precisamos máis soberanía para decidir sobre o noso mar, sobre as nosas rutas e sobre o noso futuro como país.”
A rexedora lembrou que durante aqueles meses, trala caída dos contedores do buque Toconao, Muros recibiu a visita de dúas delegacións europeas, interesadas en coñecer de primeira man o impacto do vertido e o traballo desenvolvido desde o Concello, o que, en palabras da alcaldesa, “contrastou coa inacción e o silencio da Xunta, que tentou minimizar o sucedido mentres os concellos afectados asumían en solitario a defensa do territorio”.
E concluíu: “Seguimos traballando con constancia, exixindo ante calquera institución a nosa soberanía como pobo para ter un mar máis limpo e unhas rutas máis seguras, que non poñan en risco a vida, o territorio nin o futuro da nosa xente”.
