O lugar de Manselle, no concello de Dodro, converterase o sábado 4 de outubro nun punto de encontro para a música, a arte e a cultura popular coa celebración do FestiValo, un evento que aposta pola “resistencia e alegría” como lema central.
A xornada comezará ás 13:00 horas co vermú musical a cargo de La Fabulosa, ao que seguirá a actuación de Maruxa e Coralia Dilleis no Souto de Manselle.
A programación da tarde arrincará ás 18:00 horas coa Foliada do Montiño, continuando coas Cantareiras do Montiño ás 19:00 e coas Regueifeiras de Dodro ás 19:30. Xa ás 20:00 será a quenda de Xairo d’Herbón, para dar paso a Vimbio ás 21:00 no escenario principal, e pechar a noite co DJ Dillei Residente a partir das 22:30 horas.
Durante todo o día, o público poderá gozar tamén da Acción Artística Galeoska, ademais dun food truck dispoñible a partir das 17:00 horas.
O evento, organizado co apoio do Concello de Dodro e a Deputación da Coruña, inclúese dentro da Rede Cultural 2025, e pretende ser un espazo de convivencia no que tradición, música e creación contemporánea se dean a man.
