O Concello de Boiro celebrará este domingo 2 de novembro unha nova edición do Día da Bicicleta, un encontro lúdico, ambiental, saudábel e deportivo que busca “fomentar a convivencia e a diversión arredor deste vehículo entre persoas de todas as idades”.
O percorrido será o mesmo que en edicións anteriores, cunha distancia total de 14 quilómetros. A saída terá lugar ás 11.00 horas na praza de Galicia e discorrerá pola rúa Principal e a avenida de Compostela ata Escarabote, onde se realizará o primeiro reagrupamento na Agramuíña. Desde alí, a comitiva regresará a Boiro seguindo o paseo marítimo e diferentes rúas do municipio, para dirixirse despois cara a Cabo de Cruz, onde se fará o segundo reagrupamento xunto á lonxa. O regreso á Praza de Galicia será pola ruta do Sestelo, Seán e Exipto, ata entrar na Avenida da Constitución.
Á chegada está previsto un sorteo de material deportivo entre todos os participantes inscritos. O evento non ten carácter competitivo e está pensado para nenos e adultos, polo que contará cun dispositivo especial de seguridade no que participarán a Policía Local, Protección Civil, a Garda Civil e voluntarios do Club Ciclista Barbanza e Boiromotos.
A iniciativa está promovida por La Voz de Galicia, co patrocinio de Vegalsa e Jealsa, e a colaboración de Bici Daniel Ríos, Chicolino, Autos R. Outeiral e o Club Ciclista Barbanza. “Trátase dun evento familiar no que participan familias enteiras e que só é posible grazas á implicación das empresas e institucións colaboradoras”, destacou Ramón Ares.
As inscricións poden realizarse no Departamento de Deportes —no edificio das Colonias e Praia Xardín— ou por correo electrónico en deportes@boiro.org antes do venres 31 de outubro ás 12.00 horas. Poderán participar maiores de seis anos e será obrigatorio o uso de casco, non permitíndose bicicletas con rodíns.
