Este venres 24 de adulto o Centro Social de Abanqueiro volve ser un referente teatral no Barbanza e en Galicia. O motivo será a estrea en Boiro da obra Tres vellas na romaría, unha proposta da produtora Excéntricas para público adulto. A cita será este venres ás 21.00 horas, con entradas á venda dende unha hora antes da función.
A función virá da man de tres grandes das nosas táboas: Celso Sanmartín, José Luís Gutiérrez e o ribeirán Quico Cadaval.
O espectáculo sae “na procura nas memorias das devanceiras os días gloriosos de romarías e festas, os bailes, os milagres, as devocións, os exorcismos, as empanadas e os melindres, o viño novo e a caña brava…”
As Tres Vellas, segundo adiantan dende Excéntricas, “saen cos seus máis fermosos panos rameados para ir bailar as muiñeiras, xotas e bailes charros nos terreiros das festas”. O repertorio componse de todo o que rodea o mundo estival das romarías: milagres, romances, ofrendas devotas, relatos humorísticos, un mundo no que se mestura a superstición e o festeiro escepticismo. Unha viaxe equidistante aos tempos de “Deus é bo, mais o Demo non é mao”. Un repertorio no que se xuntan os xeonllos esfolados das procesións cos pés encalecidos dos bailes. Parece un mundo esquecido, mais As Tres Vellas regresan para contalo coa mesma frescura que se fose onte.
