A Asociación Boirense de Empresas (ABE) pon en marcha a campaña Truco ou trato no comercio local, unha iniciativa coa que se busca animar á veciñanza a visitar e mercar nos establecementos de Boiro coincidindo coa celebración do Samaín (Halloween), especialmente o venres 31 de outubro, cando se agarda unha gran afluencia de público polas rúas da vila.
Para reforzar o ambiente festivo, a ABE distribuirá entre os comercios asociados bolsas de lambonadas, que os establecementos poderán entregar aos seus clientes como agasallo durante esa xornada.
Ademais, a iniciativa completarase cunha campaña en redes sociais baixo o mesmo lema, na que será difundido o espírito do Truco ou trato no comercio local e organizarase un sorteo de tres cestas de caramelos de Samaín entre todas as persoas que participen no concurso de comentarios publicado nos perfís de ABE. O sorteo e entrega das cestas realizarase o venres 31 de outubro.
Con esta acción, a ABE pretende impulsar o consumo local, fomentar a participación dos comercios nas campañas colectivas e contribuír a crear un ambiente atractivo nas rúas durante unha data moi esperada polos máis pequenos e polas familias.
“Queremos que o comercio de Boiro tamén se contaxie do espírito de Halloween e que as familias desfruten da experiencia de facer o seu truco ou trato nas tendas da vila”, explican desde a Asociación Boirense de Empresas.
A campaña forma parte das accións anuais de dinamización comercial promovidas pola ABE, co obxectivo de reforzar a relación entre comerciantes e clientela, e facer de Boiro un referente de comercio próximo, vivo e cheo de actividade.
