O Centro Galego de Vela, en Vilagarcía de Arousa, acolle desde este xoves a Copa de España de ILCA 6 (antigo Láser Radial), unha cita de alto nivel que reúne en augas da Ría de Arousa a máis de 150 regatistas chegados de todas as comunidades autónomas, incluíndo Canarias e Baleares, así como participantes internacionais de Estonia, Guatemala, Panamá, Suíza e Portugal, inscritos na categoría Open.
Durante a xornada inaugural levou a cabo o proceso de medición oficial das embarcacións, onde xuíces especializados revisaron #ver, cascos e aparellos para garantir o cumprimento do regulamento. A competición dispútase ata o domingo e contempla nove mangas repartidas en tres días, cun mínimo de dúas probas necesarias para validar o campionato.
O comité de regatas adiantou a saída do venres ás 11:00 horas, unha hora antes do previsto, co fin de aproveitar as mellores condicións de vento, que se esperan do nordeste con refachos de ata 12 nós.
As categorías en liza son: Absoluto (masculino e feminino), Sub21 Feminino e Sub19 (masculino e feminino). A entrega de premios celebrarase o domingo ás 17:30 horas, sendo a última saída posible ás 16:00.
O evento está organizado pola Real Federación Galega de Vela, delegada pola Real Federación Española, co patrocinio da Xunta de Galicia, a Deputación de Pontevedra, e a colaboración do Concello de Vilagarcía de Arousa, a Autoridade Portuaria e a Capitanía Marítima.
