O alcalde de Padrón, Anxo Arca, e a concelleira de Servizos Sociais, Mariló Saco, inauguraron este sábado a exposición O Padrón rural en imaxes, que estará aberta ao público este domingo, 19 de outubro, na Casa dos Capeláns (Iria Flavia) de 12.00 a 13.30 horas
Trátase dun proxecto do Voluntariado interxeracional 2025 promovido pola Oficina de Voluntariado de Padrón, no que 14 persoas mozas e 14 maiores recolleron fotos antigas do rural padronés, e tomaron imaxes actuais para ver a súa evolución. Tamén participaron nun proceso de formación desenvolvido pola fotógrafa Verónica Ramilo Graña e pola cooperativa de intermediación cultural Rexenerando, que tamén se encargaron de montar a exposición.
Anxo Arca amouse orgullo “da parte rural, que fai Padrón máis grande”. O alcalde asegurou que en Padrón “hai unha combinación equilibrada entre o ámbito rural e urbano”.
Pola súa banda Mariló Saco Vigo agradeceu a implicación das persoas voluntarias nun proxecto que “implicou moitas horas de investigación e traballo en equipo”, como indicou Pilar Lorenzo, responsábel da oficina de voluntariado de Padrón.
A inauguración de hoxe estivo reservada para as persoas que participaron no proxecto. O acto rematou cunha conversa con Vanesa Quintáns e Yolanda Buceta sobre as potencialidades do rural padronés e as posibilidades que ofrece para emprender.
Este domingo, 19 de outubro, a mostra estará aberta ao público na Casa dos Capeláns de 12.00 a 13.30 horas.
