O alcalde do Concello de Outes, Francisco Calo, agradeceu á Xunta de Galicia o seu apoio para investir, a través dun convenio coa Consellería de Presidencia, un total de 72.539 euros que permitirán levar a cabo “importantes melloras” no ximnasio e a Piscina Municipal. En concreto, o montante económico comprometido polo Goberno autonómico –máis de 65.000 euros, o 90% do orzamento total- permitirá a compra das máquinas novas de cardio da sala do ximnasio –moi deterioradas na actualidade-, posibilitará a adquisición dun elevador hidráulico para mellorar a accesibilidade á piscina das persoas con mobilidade reducida, así como a mellora das infraestrutura que permite regular as sonda de temperatura da auga e do aire da instalación.
“Falamos de actuacións moi necesarias e moi demandadas polos máis de 300 veciños que cada día pasan pola piscina e polo ximnasio”, apuntou Calo, quen recordou que “a instalación Outes abriu as súas portas en maio do 2007 e, dende aquela, non sen ten feito ningunha mellora relevante”.
O alcalde aproveitou para explicar que “o complexo deportivo da Piscina Municipal de Outes conta con varias dependencias diferenciadas, pero todas dentro do mesmo edificio, como son dúas salas de actividades, sala de mantemento, sala de ximnasio e o propio vaso da piscina, o que fai que teña un gran número de usuarios”.
Calo indicou tamén que “na actualidade, tanto o C.E.I.P. como o I.E.S. Francisco Añón de Outes acceden ás instalacións para dar módulos de educación en convenio co concello”.
E engadiu: “Temos convenios con varias entidades deportivas e sociais como, por exemplo, o equipo de Tríatlon que prepara as súas horas de natación na piscina e o Centro de Día de Outes que acude unha vez o mes como terapia para os seus usuarios e que, a partir de agora, poderán facelo sen limitacións coa mellora no acceso ó vaso da piscina”, explicou.
Por último, Calo fixo saber que estas actuacións, que terán que levarse a cabo antes de que termine o 2025, “non poderían ser unha realidade sen o investimento da Xunta Galicia”.
