A conselleira do Medio Rural, María José Gómez, acompañada pola directora xeral da Axencia Galega de Desenvolvemento Rural, Paz Rodríguez, reuniuse este martes 7 de outubro co alcalde de Outes, Francisco Calo. No encontro avaliouse a colaboración entre o Concello e a Consellería para impulsar proxectos en beneficio do rural deste municipio.
En particular, avanzouse no desenvolvemento da parcelaria de San Pedro de Outes e San Miguel de Valadares, que xa se atopa en fase de acordo firme e que beneficia preto de mil propietarios. Ademais, abordouse a mellora das infraestruturas rurais e o impulso ás agrupacións forestais de xestión conxunta, co fin de optimizar a xestión dos montes no territorio municipal, entre outras cuestións.
