A Plataforma en Defensa da Sanidade Pública no Barbanza vaise concentrar novamente este xoves 23 de outubro ao mediodía, a partir das 12.00 no Centro de Saúde de Ribeira. O obxectivo será esixir a cobertura do cen por cen das prazas do persoal dos ambulatorios de Ribeira e de Aguiño. Máis en concreto, reclamarase a cobertura das prazas de médicas/os de familia en Ribeira. Ademais, este venres ás 12 celebrarase tamén unha concentración na Pobra do Caramiñal, reclamando tamén a cobertura do cen por cen das prazas de medicina de familia.
Como de costume, a axenda inclúe a lectura de manifestos en defensa dun sistema sanitario público, universal e de calidade, que porán o foco na precariedade do servizo sanitario na comarca do Barbanza, que, segundo denuncian dende a plataforma, “levan anos sufrindo falta de medios e persoal” e “precisan medidas urxentes da Consellería de Sanidade para emendar unha situación, de por si crítica, que se agrava estas semanas de xullo e agosto coa chegada da poboación turista”.
Entre as principais queixas figuran a falta de médicas/os de familia, o colapso nas citas de atención primaria, a redución de servizos no hospital comarcal e a precariedade laboral do persoal sanitario. Os manifestantes tamén esixen máis recursos para a atención á saúde mental e unha maior cobertura nos centros periféricos.
