A II Mostra de Teatro de Porto do Son vai arrincar este sábado 18 de outubro co espectáculo Vicio houbo sempre, de Atenea García. Será ás 21.00 horas, con entrada gratuíta, na Casa da Cultura de Porto do Son.
Vicio houbo sempre é unha divertida e fresca proposta de narración oral dirixida ao público adulto onde Atenea García presenta historias de vida recollidas a mulleres que xa cumpriron 80 anos.
Son historias que falan do desexo, do pracer, de sexualidade. A peza fala do amor e da vida que sempre houbo nas marxes fiando contos sobre a diversidade sexual, a ausencia na emigración e, como non, a diversión nos bailes das festas! Todo, ao ritmo de historias e cancións acompañadas coa pandeireta.
Esta actividade co-impulsada polo Concello do Son está incluída no marco da campaña Liberdade de ser e sentir da Deputación da Coruña.
