A sección sexta da Audiencia Provincial da Coruña condena a tres cazadores ao pagamento dunha multa, a cada un deles, de 540 euros por lesionar a un veciño de Boiro que lles chamou a atención por disparar a vinte metros da vivenda da que era a súa parella no momento de suceder os feitos. O tribunal considéraos autores dun delito leve de lesións do artigo 147.2 do Código Penal. Ademais, deberán indemnizar conxuntamente á vítima con 429 euros.
Na sentenza, a Sala relata que os acusados, en lugar de abandonar o lugar, agrediron ao afectado. En concreto, entende probado que un deles o agarrou do pescozo e o tirou ao chan, onde os outros dous sospeitosos lle propinaron patadas en varias partes do corpo e saltaron sobre as súas costas. Como consecuencia dos feitos, sufriu diversas contusións e erosións, das que tardou en curar 11 días.
Os maxistrados destacan que a proba practicada no xuízo “non resultou suficiente para enervar a presunción de inocencia” dos acusados. O tribunal descarta a tese da caída accidental que mantiveron os sospeitosos, pois asegura que quedou desvirtuada pola declaración dunha testemuña directa dos feitos. A sentenza non é firme, pois cabe presentar recurso ante o TSXG.
