UCIN Boiro compartiu un comunicado no que denuncia publicamente a situación na que se atopa o parque cuberto da praza de Galicia, nas súas palabras “unha grave situación de insalubridade que afecta a un espazo utilizado diariamente por nenos e familias do municipio”. Sinalan tamén que “desde hai meses acumúlanse excrementos de pomba sobre a estrutura que cobre a zona de xogos, constituíndo un foco de infección que pon en risco a saúde dos menores”. Engaden que entre as enfermidades asociadas a esta situación “inclúense a psitacosis, histoplasmosis, criptococosis e mesmo a gripe aviaria”.
A agrupación apunta no comunicado que “esta problemática tamén se pode ver fóra o parque, dado que todas as rúas de Boiro presentan excrementos do devandito animal, incluíndo bancos públicos onde sentan decenas de persoas a diario, o que amplifica o risco sanitario para toda a comunidade”.
UCIN Boiro considera que o Concello está a abandonar as súas funcións en materia de mantemento, “priorizando a súa participación en actos festivos e eventos sociais mentres ignoran un problema que afecta directamente aos máis pequenos e vulnerábeis da comunidade”.
UCIN Boiro esixe “a limpeza e desinfección inmediata do parque, a instalación de medidas permanentes que impidan o acceso de pombas e a asunción de responsabilidades políticas por esta grave omisión”. E engaden: “Consideramos inaceptábel que un espazo público destinado á nenez estea en condicións que comprometen a saúde e seguridade dos usuarios”.
