Ante os recentes cambios nas alcaldías de varios concellos galegos mediante mocións de censura e pactos difíciles de explicar á cidadanía, desde UCIN Galicia veñen de emitir un comunicado no que lanzan unha mensaxe clara: “A política municipal debe ser limpa, transparente e ao servizo da veciñanza, non dos intereses partidistas”.
Comentan que nas últimas semanas “observamos manobras políticas que, malia seren legalmente válidas, xeran dúbidas na sociedade sobre a súa lexitimidade democrática”. Poñen o foco en Ribeira, onde o Partido Popular recupera a alcaldía tras unha moción de censura ao BNG, apoiada polos concelleiros independentes do PBBI, unha manobra que situará a Mariola Sampedro (PP) como a nova alcaldesa; tamén lembran o caso de Noia, onde o PSOE toma a alcaldía ao PP, tamén mediante unha moción de censura; e en Fisterra, ondeLuis Insua accede á alcaldía nun contexto marcado por acusacións de transfuguismo e “pactos escuros”. Estes movementos políticos, sinala UCIN, “deixan no aire preguntas que a cidadanía merece ver respondidas”. Por exemplo: “Respectan estes pactos a vontade popular expresada nas urnas? Foron explicados con claridade antes de executarse?
Responden ao ben común ou a intereses persoais ou de partido?”
Desde UCIN Galicia, o seu coordinador José Luis Calo sinala: “As alcaldías non son premios políticos nin tronos de poder. Son espazos de servizo
público. A cidadanía ten dereito a entender por que se producen estes cambios e a sentirse parte activa da vida política local”.
E engade: “A política local non pode continuar movéndose entre sombras e despachos pechados, sen explicar nada á xente. Un goberno municipal só é lexítimo se se sustenta na confianza cidadá, na rendición de contas e na honestidade. Desde UCIN Galicia defendemos que cada moción de censura non só debe cumprir coa legalidade, senón tamén coa lexitimidade democrática, sendo explicada, motivada e compartida coa veciñanza”.
Avogan por non facer “máis pactos na sombra” e por apostar por unha “política honesta, que se fai con luz, transparencia e compromiso coa xente”.
