Galicia estará este sábado, San Vicente de Paul, baixo a influencia da borrasca ex-Gabrielle, que se moverá cara ao sur situándose moi próxima á comunidade. Agárdase unha xornada con ceos cubertos por nubes de tipo medio e alto e con precipitacións máis frecuentes e intensas no oeste e sur, onde poderán ser localmente fortes.
As temperaturas mínimas manteranse sen cambios, mentres que as máximas descenderán lixeiramente(20-23 graos máxima). O vento soprará do sur, frouxo con intervalos moderados en terra e con refachos fortes en zonas altas, virando a nordés durante a noite.
O domingo o ceo estará parcialmente nubrado e con momentos de alternancia de nubes e claros a partir do mediodía. As temperaturas mínimas ascenderán lixeiramente e as máximas quedarán sen cambios. O vento soprará moderado do nordés, forte entre Sisargas e Fisterra.
O noso mar; Vento do sur á mañá, do sueste á tarde e do nordés á noite, forza 3 a 5 á mañá e 4 a 6 á tarde e á noite. Forte marusía. Visibilidade boa á mañá e regular á tarde e á noite. Mar de fondo do oeste á mañá e sudoeste á tarde e á noite, con ondas de 1.5 a 2 metros á mañá, 2 a 3 metros á tarde e 3.5 a 4.5 metros á noite.
